通常宣傳迪士尼的口號, 都離不開夢想之旅, 奇妙旅程等, 其他國家的迪士尼是否貼題, 我不知道, 不過, 我覺得前往東京迪士尼, 的而且確是一件奇妙的事情, 奇的是跟團來, 總想將這行程改為自由活動; 而妙的是當換上了自由行身份, 卻又總想前來.
遊覽這些大型遊樂場, 我習慣有遲冇早. 通常我都是10時左右才到, 可能因為我唔太玩機動遊戲,
加上多選閒日前往, 所以遲少少到都冇所謂(至少我未遇過因人太多唔比入的情況); 不過我就未試過在出發前就計劃定早走, 試問一個大型遊樂場,
你連場都未入, 點解會知行半日就夠, 除非你真的遊戲唔玩, 表演唔睇, 不過如果係咁, 一開始你就去行街啦, 來遊樂場做咩?
迪士尼最有趣的地方, 在於無論你曾經入場多少次, 或者你唔再玩機動遊戲, 但只要入到場內,
你依然可以儘興而回(附加大袋細袋). 可能因為在迪士尼內, 你唔再驚那些平時嚇到你跳上檯面尖叫的老鼠(不過在迪士尼見到果D老鼠,
你都可能會尖叫); 亦唔怕D鴨有禽流感(人流感可能有, 咁多人圍住); 你唔再害羞, 還主動和女性(如: 睡公主)影親密照;
更有一大班豬朋(專用模特兒常說要同隻豬影相, 我問佢邊隻豬, 佢指住隻Winnie the Pooh)狗友(Pluto, Goofy)在等你;
每次眼見你班老友被人圍住, 連行都行唔到, 你會發輝朋友的義務, 怒視那些纏住你老友的學生妹; 甚至不惜推開D小朋友, 撞開D老人家,
來為老友解圍; 你不需顧及年齡, 可以帶著一頂古怪帽子四圍行(還要扮可愛); 亦不再顧及面子, 可以隨意坐在地上進食(下午兩三點就最多這種人);
迪士尼甚至可以讓你放下一齊, 包括煩惱, 哀傷和金錢(你要知金錢是萬惡的, 迪士尼讓你放下它, 都是為你設想), 多奇妙.
雖然我不是迪士尼Fans, 但過去10年, TDL與TDS加起來都入過5次, 有友人問: 還會不會入場? 我的答覆是: 只要有友人想入, 我唔介意入. 問我原因: 因為在迪士尼, 真的玩得好開心.
