正所謂人生有幾多個十年, 從我寫下首個自由行行程至今, 差不多已有十年, 所以在此分享一下這十年來的部份轉變:
十年前, 編寫一個行程, 我會買一堆旅遊書搵資料; 十年後, 只需上網便有想要的資料, 不過我依然會買一堆旅遊書.
十年前, 見到報紙雜誌有介紹日本的資料, 都會剪下來儲起, 而備不時之需; 十年後, 那些剪報依然健在, 不過一次都冇睇過.
十年前, 寫一個行程可能要花四五個月時間; 十年後, 只需一日便有草稿, 四五日便可寫好一個行程, 不過到出發前, 依然一改再改.
十年前, 我會在旅行社訂機票酒店; 十年後, 我多數上網訂酒店, 至於機票就會搵友人的旅遊代理, 不過唔知點解, 每次都要最後一刻才確定到機位.
十年前, 唱円會四圍格價, 當時匯率大約是7算(¥100=HK$7); 十年後, 是但搵間銀行唱, 因為事實上各銀行/找換店的匯率相差無幾, 反而現在差不多10算(¥100=HK$10)才叫人肉赤.
十年前, 坐飛機總想坐窗口位; 十年後, 已經覺得冇乜所謂, 因為隻窗一係在機翼旁, 一係根本連窗都冇.
十年前, 去到日本, 我是聾啞人士, 唔識聽, 唔識講; 十年後, 就算我試過學日文, 我依然是聾啞人士.
十年前, 去到日本, 最緊要搵電話打返屋企報平安; 十年後, 莫說是電話, 就算酒店大堂有免費電腦上網, 連E-mail都懶得打.
十年前, 用菲林相機, 見到樣樣都想影; 十年後, 換了數碼相機, 隨隨便便就影千幾張相, 反而冇咗果種心情.
十年前, 在日本每晚都要行便利店; 十年後, 已經可以一間便利店都唔行.
十年前, 出發前記下一間又一間的出名食店, 打算去幫襯; 十年後, 幫襯得最多的可能是吉野家, 因為旅友都唔鍾意等位.
十年前, 每次都買一堆手信給友人, 友人收到唔想收; 十年後, 唔再買手信返港, 友人問我點解冇手信.
十年前, 買一堆日本旅遊大使做手信; 十年後, 買一堆日本旅遊大使自己儲.
十年前, 每次回港後, 都會整一本大相簿帶出街與友人分享; 十年後, 所有相片存係電腦, 冇人問津, 最後只好用來寫網誌.
十年前, 我是一個自由行新手; 十年後, 友人話我係達人(專家), 不過事實上, 我依然會上錯火車, 企錯巴士站等車.
十年前, 因為一時興起, 寫下一個又一個行程和友人去日本; 十年後, 我渴望有友人寫下一個行程, 帶我去日本.
P.S. 以下內容和本誌標題無關, 因為任性, 懶散(雖然近排工作繁忙, 但我並不想將我的懶散,
歸究於此)和外出取材, 所以停誌約兩個月, 雖然沒有發誌, 亦冇留言(雖然我平時亦甚少回覆留言), 但其實我每天都有看訪客記錄,
在此衷心感謝每位在我休息期間前來的網友, 實在不勝感激, 多謝各位!
