我的"騎呢"旅友

曾經在討論區內, 見過某位仁兄在回覆別人提問時, 講述第一次和朋友去日本自遊行, 回港後友人均讚不絕口. 看完那篇回覆後, 我最先想到的是此人有一班幾好的朋友. 說實在, 我就冇咁好彩, 我班"旅友", 個個都古古怪怪難服侍, 而且要求多多又唔講. 所以我決定冒生命危險, 在此約略介紹一下:

旅友個案一: 佢年紀有D大, 一頭白髮, 平時行得慢, 但係佢既興趣居然係追火車, 明明行去月台時, 喺後面跟住行, 但係佢一見到月台有火車停咗喺到, 就會一個箭步爬我頭, 企圖衝上火車, 去過日本既都應該知, 就算同一個月台既火車, 都可能行既係唔同路線, 好在佢從未試過成功, 如果唔係, 我都唔知失物認領處幫唔幫到我.

 

旅友個案二: 呢位仁兄有樣特殊技能, 就係每朝早7點左右已經可以出發, 即係平均6點(香港時間5點)左右, 佢就起咗身, 喺間房度行來行去嘈住你嗰隻, 不過, 能力越大後遺症亦越大, 所以佢下午4點左右就要搵地方休息.

 

旅友個案三: 一個字快, 平時計劃行程, 我多數一日預三個地方, 不過此人可以將一個平均需要3小時遊覽的地方, 大約1.5小時左右行完, 比正常快一半左右, 所以我每日都要預留1-2個景點作後備之用.

 

旅友個案四: 基本上此人要求的是全景團, 而且多數在秋季出發, 所以通常都是紅葉團, 對於購物佢可以話完全冇興趣, 最多都係買吓手信. 晚上佢寧可喺酒店上網, 都唔願意行未收既舖頭. 雖說是全景團, 不過, 後來我才知佢連寺院都冇興趣, 當年誤將他帶住日光東照宮, 雖然佢話冇所謂, 叫我慢慢睇, 不過我就完全感受到背後有一股氣想快d走.

 

旅友個案五: 此人正好和上述兩位相反, 如果"旅友三"是快一半的話, 咁佢大約係慢一半, 而且仲經常投訴唔夠時間行. 本來我都冇乜所謂, 但佢有習慣喺臨行時先去廁所, 而且仲要開大, 如果要趕車就真係死得, 不過佢堅持佢呢D叫悠閒; 另外, 佢既興趣係行舖頭, 雖然佢唔承認, 但明明喺D冇舖頭既地方, 佢就烏眉瞌睡, 一見有舖頭就兩眼發光, 點都要入去兜返轉, 咁都唔係鍾意行舖頭, 係咩?  

 

旅友個案六: 其實都唔知佢算唔算孤寒, 不過, 去旅行佢既口頭禪係:[ 要比錢既地方我未必會入.] 試過有次我唔得閒一齊去, 只係幫佢寫行程, 當中有一日係去池袋既偵探貓樂園, 不過佢唔知睇錯D乜, 以為免費入場(我有寫入場費), 結果去到發現要比300円入場費, 死都唔肯入. 當時個匯率都仲係6幾, 都唔駛20蚊, 一場去到咁都慳?

 

旅友個案七: 佢係天生既職業賭徒, 發達係佢既夢想, 輸錢係佢既強項, 試過去五日東京, 有兩日佢都喺係馬場度過. 基本上購物同風景佢都唔啱, 咁除咗賭, 佢去日本做乜?, 睇女囉, 嗰D有宣傳女郎既展覽就最啱佢. 不過, 其實佢最想去沖繩, 每次嬴錢時都話去, 結果之後輸錢都要改地點.

 

旅友個案八: 此人看似平常, 因為佢話乜嘢行程都冇所謂(可能咁先係最大問題), 而且自稱半專業攝影師, 所以有佢同行, 影相就絕冇煩惱, 不過, 佢最大問題係冇錢去. 其實, 我有D懷疑佢一係就唔識計數, 一係就敷衍我, 佢份人工明明比我高一截, 我叫佢每月儲$500, 兩年都有萬二, 都可以每兩年去一次啦, 但佢就點都儲唔到. 另外, 因為佢買襯嘢都想知係幾錢港紙, 所以我同佢講100円約7蚊(當時係咁上下), 叫佢自己計吓, 點知佢冇一次計得啱, 都唔明數學會考點解佢會合格, 仲話讀A-Math.

 

以上只不過是我班"旅友"的部份"騎呢"要求同習慣, 真係要講的話, 何止咁少. 不過佢地都有一個共通既習慣, 就係出發前講行程又唔聽; 有乜要求又唔講, 次次都係喺臨上機先話想去睇咩, 要去邊度買嘢, 要我即時諗點佢, 真係吹脹.